ഒരാളുടെ സ്വഭാവം ധരിക്കുന്ന ഷൂസ് കണ്ടാല്‍ അറിയാം.
കന്‍സാസ് യൂണിവേഴ്‌സിറ്റി റിസര്‍ച്ച് ടീമിന്റെ അഭിപ്രായത്തില്‍ ഒരാളുടെ സ്വഭാവം ഏതാണ്ട് തൊണ്ണൂറു ശതമാനവും അയാള്‍ ധരിക്കുന്ന പാദരക്ഷകള്‍ നോക്കി പറയാം. ഇതൊരുപക്ഷേ എങ്ങിനെ ശരിയാവും എന്ന് തോന്നാം. ചെറുപ്പകാലത്ത് എന്റെ ഒരു സുഹൃത്ത് പെണ്‍കുട്ടികളുടെ മുഖത്തിലും അധികമായി അവര്‍ ധരിക്കുന്ന പാദരക്ഷകള്‍ക്കു പ്രാധാന്യം കൊടുക്കുമായിരുന്നു. ‘ഇടുന്ന ചെരുപ്പ് കണ്ടാല്‍ അറിയാം,’ എന്ന് അവന്‍ പറയുന്നത് ഇത് വായിച്ചപ്പോള്‍ ഞാന്‍ ഓര്‍ത്തുപോയി.
ജേര്‍ണല്‍ ഓഫ് റിസര്‍ച്ച് ആന്‍ഡ് പേര്‍സണാലിറ്റിയില്‍ ആണ് ഈ പഠനം പബ്ലിഷ് ചെയ്തത്. അറുപത്തിമൂന്ന് വിദ്യാര്‍ഥികള്‍ ഇരുന്നൂറ്റിഎട്ടു ആളുകളുടെ പാദരക്ഷകളുടെ ചിത്രങ്ങള്‍ കണ്ടതിനു ശേഷം ഒരു ചോദ്യാവലിയില്‍ ഉത്തരങ്ങള്‍ നല്‍കുകയായിരുന്നു. അതില്‍ നിന്നുമാണ് ഈ നിഗമനങ്ങളില്‍ ശാസ്ത്രജ്ഞന്മാര്‍ എത്തിച്ചേര്‍ന്നത്. അതിലെ ചില പ്രധാന കാര്യങ്ങള്‍ ഇവിടെ എഴുതുന്നു. കൂടുതലായി ഇത് വായിക്കണം എന്നുള്ളവര്‍ താഴെയുള്ള ലിങ്കില്‍ അമര്‍ത്തി വായിക്കുവാന്‍ അപേക്ഷ.
വിലകൂടിയ ഷൂസുകള്‍ ഉള്ളവര്‍ തീര്‍ച്ചയായും പണക്കാര്‍ തന്നെ ആയിരുന്നു. വളരെ ഫ്‌ലാഷി, കളര്‍ഫുള്‍ ഷൂസുകള്‍ പുറം മോടിയുള്ള ആളുകള്‍ ആയിരുന്നു ധരിച്ചത്. ഒരു പൊടിപോലും തട്ടാതെയുള്ള ഷൂസുകള്‍ ധരിച്ചിരുന്നവര്‍ അതീവ ശ്രദ്ധാലുക്കള്‍ ആണെന്നും പഠനം കണ്ടെത്തി. സാധാരണ ഷൂസുകളും ഉപയോഗ ക്ഷമതയുള്ള ഷൂസുകളും ധരിച്ചിരുന്നവര്‍ പൊതുവേ അംഗീകാരം ലഭിക്കുന്ന ആളുകള്‍ ആയിരിക്കും. വളരെ സാഹസികതയുള്ളവരും ദേഷ്യ സ്വഭാവം ഉള്ളവരും ആങ്കിള്‍ ബൂട്ടുകള്‍ ഉപയോഗിക്കാറുണ്ടെന്നും കണ്ടെത്തപ്പെട്ടു. എന്നാല്‍ ഒട്ടും സുഖകരം അല്ല എന്ന് ഒറ്റ നോട്ടത്തില്‍ തോന്നാവുന്ന ഷൂസുകള്‍ ധരിക്കുന്നവര്‍ വളരെ സമാധാനപ്രിയര്‍ ആകുമെന്നും പറയുന്നു. ആളുകളുടെ വയസ്സ്, ആണാണോ പെണ്ണാണോ, ആളുകളുടെ മാനസിക നില തുടങ്ങിയ കാര്യങ്ങള്‍ വളരെ വ്യക്തമായി പറയുവാന്‍ ഈ ഷൂസ് ഒബ്‌സെര്‍വേഷന്‍ കൊണ്ട് കഴിഞ്ഞു.അറ്റാച്‌മെന്റ് ആങ്ക്‌സൈറ്റി അല്ലെങ്കില്‍ തങ്ങളുടെ സ്‌നേഹ ബന്ധങ്ങളെപ്പറ്റി ആകാംഷയുള്ള ആളുകള്‍ ഏപ്പോഴും പുതിയതും വൃത്തിയുള്ളതുമായ ഷൂസുകള്‍ ധരിക്കും. സ്വന്തം പ്രതിശ്ചായയില്‍ ഇവര്‍ക്ക് എന്നും ഒരുതരം ആകാംഷയുണ്ടാവുക സാധാരണം ആയിരിക്കും എന്നാണു വിദഗ്ദര്‍ പറയുന്നത്. മറ്റുള്ളവര്‍ തങ്ങളെപ്പറ്റി എന്ത് വിചാരിക്കും എന്ന ഒരു വിചാരം ഏപ്പോഴും ഇവര്‍ക്ക് കാണും.
ഷൂസുകള്‍ കുറെയൊക്കെ ആളുകളുടെ സ്വഭാവം വിളിച്ചറിയിക്കും. അതുപോലെ മറ്റൊരാള്‍ ഇടുന്ന ഷൂസുകള്‍ നമ്മളെല്ലാം നോക്കാറും ഉണ്ട്. ആളുകളുടെ സ്വഭാവത്തിന്റെ ഒരംശം അതില്‍ നിന്നും നമുക്ക് മനസ്സിലാക്കുവാന്‍ കഴിയും. ഈ പഠനത്തില്‍ ഏറ്റവും വികൃതമായ ഷൂസുകള്‍ ധരിച്ചിരുന്നവര്‍ക്ക് മറ്റുള്ളവരുമായി സുഹൃത്ത് ബന്ധങ്ങള്‍ ഉണ്ടാക്കുവാനുള്ള കഴിവ് കുറവായിരിക്കും എന്ന കാര്യം കണ്ടത്തപ്പെടുകയുണ്ടായില്ല.ബോറന്‍ ഷൂസുകള്‍ ധരിക്കുന്നവര്‍ തങ്ങളെപ്പറ്റി മറ്റുള്ളവര്‍ എന്ത് ചിന്തിക്കും എന്ന് തീരെ ചിന്തയില്ലാത്തവര്‍ ആയിരുന്നു.
അങ്ങിനെ ഷൂസുകള്‍ ആളുകളുടെ സ്വഭാവം വിളിച്ചറിയിക്കുന്ന ഒരു വസ്തുവാണ് എന്നുതന്നെ ഈ പഠനം നടത്തിയവര്‍ പറയുകയാണ്. എന്നാല്‍ ചില ആളുകള്‍ മറ്റുള്ളവരെ ബോധിപ്പിക്കുവാനായി കരുതിക്കൂട്ടി നല്ല ഷൂസുകള്‍ ധരിക്കാറുണ്ടത്രേ ! സത്യത്തില്‍ ഈ ഷൂസുകളും അവരുടെ സ്വഭാവവുമായി അധികം ബന്ധവും ഉണ്ടാകാറില്ല. ഇത് വളരെ ചുരുക്കമായി മാത്രം കാണുന്ന ഒരു കാര്യം ആണെന്നും സൈക്കോളജിസ്റ്റുകള്‍ പറയുന്നു.
Read & Share on Ur Facebook Profile: http://boolokam.com/archives/70310#ixzz2IFpmXpnP
