മാധവ്ഗാഡ്ഗില്‍ റിപ്പോര്‍ട്ടും ഇടതുപക്ഷവും
പ്രീജിത്ത് രാജ്
മാധവ് ഗാഡ്ഗില്‍ റിപ്പോര്‍ട്ടിനെ ചെല്ലിയുയര്‍ന്ന വിവാദങ്ങള്‍ ഇനിയും അടങ്ങിയിട്ടില്ല. പശ്ചിമഘട്ട മലനിരകള്‍ മാത്രമല്ല, സംസ്ഥാനത്തിന്റെയും രാജ്യത്തിന്റെയും പരിസ്ഥിതി സംരക്ഷണത്തിന്റെ കാര്യത്തില്‍ ഇടതുപക്ഷം പ്രത്യേകിച്ച് സിപിഐ എം തുറന്നമനസ്സോടെയാണ് നില്‍ക്കുന്നത്. ജയറാം രമേഷ് കേന്ദ്ര പരിസ്ഥിതി-വനം മന്ത്രിയായിരുന്ന വേളയിലാണ് 2010 ഫെബ്രുവരിയില്‍ പശ്ചിമഘട്ട സംരക്ഷണ ജനകീയ കൂട്ടായ്മയെ അഭിസംബോധന ചെയ്യുമ്പോള്‍, പശ്ചിമഘട്ട സംരക്ഷണത്തെ കുറിച്ച് പഠിച്ച് റിപ്പോര്‍ട്ട് തയ്യാറാക്കാനുള്ള ഒരു സമിതിയെ നിയോഗിക്കുമെന്ന് പ്രഖ്യാപിച്ചത്. മാര്‍ച്ചില്‍ തന്നെ പ്രസിദ്ധ പരിസ്ഥിതി ശാസ്ത്രജ്ഞനായ മാധവ് ഗാഡ്ഗില്‍ ചെയര്‍മാനായ 14 അംഗ കമ്മറ്റി നിലവില്‍ വന്നു. 2011ല്‍ തന്നെ പാനല്‍, റിപ്പോര്‍ട്ട് കേന്ദ്രസര്‍ക്കാരിന് സമര്‍പ്പിച്ചു. എന്നാല്‍, ഒമ്പത് മാസക്കാലത്തോളം അത് ആര്‍ക്കും കാണാന്‍ സാധിച്ചില്ല. മുക്കിവെച്ചു. ഒടുവില്‍ റിപ്പോര്‍ട്ടിന്റെ കോപ്പി ആവശ്യപ്പെട്ട് നല്‍കിയ പൊതു താല്‍പ്പര്യഹര്‍ജിയെ തുടര്‍ന്നാണ് ഇന്‍ഫര്‍മേഷന്‍ കമ്മീഷണര്‍ റിപ്പോര്‍ട്ടിന്റെ കോപ്പി ലഭ്യമാക്കാന്‍ പരിസ്ഥിതി മന്ത്രാലയത്തോട് ആവശ്യപ്പെടുന്നത്. സര്‍ക്കാര്‍ ഇതിനെതിരെ അപ്പീല്‍ പോയെന്നുള്ളതാണ് രസം. അവസാനം ഡല്‍ഹി ഹൈക്കോടതി അപ്പീല്‍ നിരസിച്ച് പുറപ്പെടുവിച്ച ഉത്തരവിന്റെ ഭാഗമായാണ് റിപ്പോര്‍ട്ട് വെബ്സൈറ്റിലിടാന്‍ കേന്ദ്രഗവണ്‍മെന്റ് നിര്‍ബന്ധിതരായത്. ഇതിലെന്താണിത്ര മറച്ച് വെക്കാനുള്ളത്! ജനങ്ങള്‍ക്ക് കാണാന്‍ പറ്റാത്ത, കണ്ടാല്‍ വിഷയമാവുന്ന എന്താണുള്ളത്? കോണ്‍ഗ്രസ് ഭരണകൂടം ഇതിന് മറുപടി പറയാനും ബാധ്യസ്ഥര്‍ ആണ്.
 |
പ്രകൃതിയുടെ സംരക്ഷണത്തെ സംബന്ധിച്ച് 1875ല്‍ ഫ്രെഡറിക് എംഗല്‍സ് എഴുതിയിട്ടുള്ള ഒരു പ്രധാനപ്പെട്ട ലേഖനമുണ്ട്. ‘പ്രകൃതിയുടെ വൈരുദ്ധ്യസ്വഭാവത്തിന് ഒരു മുഖവുര’ എന്ന ആ ലേഖനത്തില്‍ പരിസ്ഥിതി സംരക്ഷണത്തിന്റെ പ്രാധാന്യത്തെ കുറിച്ചാണ് എംഗല്‍സ് ഊന്നിപ്പറഞ്ഞിട്ടുള്ളത്. മനുഷ്യനാണ് പ്രകൃതിയെ രൂപപ്പെടുത്തുന്നതില്‍ സവിശേഷമായ പങ്ക് വഹിക്കുന്നത് എന്ന് പറഞ്ഞുകൊണ്ട് മനുഷ്യനും കൂടി ഉള്‍ക്കൊള്ളുന്ന പ്രകൃതി സംരക്ഷണമാണ് പ്രായോഗികമായിട്ടുള്ളത് എന്ന് എംഗല്‍സ് ചൂണ്ടിക്കാണിക്കുന്നു. അതോടൊപ്പം പ്രകൃതിയെ മനുഷ്യന് ചൂഷണം ചെയ്യുന്ന അവസ്ഥയെ കുറിച്ചും അദ്ദേഹം വിശദീകരിക്കുന്നു. നൂറ്റാണ്ടുകള്‍ക്ക് മുമ്പ് കമ്യൂണിസ്റ് ആചാര്യനായ ഫ്രെഡറിക്ക് എംഗല്‍സ്് നടത്തിയിട്ടുള്ള വിശകലനം ഇന്നും പ്രസക്തമാണ്. ഇന്ന് പ്രകൃതിയെ ചൂഷണം ചെയ്യുന്നതിന് നേതൃത്വം നല്കുന്നത് മുതലാളിത്തമാണ്. ചൂഷണത്തിലൂടെ ധനം സമ്പാദിക്കാനുള്ള അത്യാര്‍ത്തിയാണ് അവരെ നയിക്കുന്നത്. നദികളിലെ മണല്‍ വാരുന്നു. മണല്‍മാഫിയകളെ സൃഷ്ടിച്ച് സംരക്ഷിക്കുന്നു. പ്രകൃതിയുടെ മഴവെള്ള സംഭരണികൂടിയായ നെല്‍വയലുകള്‍ നികത്തുന്നു. നിയമങ്ങളെ മറികടന്ന് ഖനനങ്ങള്‍ നടത്തുന്നു. പാറ പൊട്ടിക്കല്‍ വ്യാപകമാകുമ്പോള്‍ ഉരുള്‍പൊട്ടല്‍ തുടര്‍ക്കഥയായി മാറുന്നു. യാതൊരു മാനദണ്ഡങ്ങളും പാലിക്കാതെ സിമന്റ് കാടുകള്‍ വെച്ച് പിടിപ്പിക്കുന്നു. മരങ്ങള്‍ വെട്ടി നശിപ്പിച്ച് റിയല്‍ എസ്റേറ്റ് മാഫിയ ഭൂമി കൈയ്യേറുന്നു. ഭൂമിയുടെ ഘടന തന്നെ മാറിപ്പോവുന്ന വിധത്തിലുള്ള കൈയ്യേറ്റം.
|
റിപ്പോര്‍ട്ടിനെതിരായി കേരളത്തില്‍ വലിയ ആശങ്കകള്‍ ഉയര്‍ന്നുവന്നു. മലയോരമേഖലകളില്‍ വസിക്കുന്നവര്‍ ഭയാശങ്കയിലായി. ഈ റിപ്പോര്‍ട്ട് പാടേ തള്ളിക്കളയണമെന്ന നിലപാടാണ് ചില മത-രാഷ്ട്രീയ സംഘടനകള്‍ സ്വീകരിച്ചത്. ഇടതുപക്ഷമാവട്ടെ റിപ്പോര്‍ട്ടിലെ കുറവുകളും അശാസ്ത്രീയതയും പരിഹരിച്ച് പരിസ്ഥിതി സംരക്ഷണത്തിന് വേണ്ട കാര്യങ്ങള്‍ ചെയ്യണമെന്ന നിലപാടാണ് സ്വീകരിച്ചത്. കേരളത്തിന്റെ നിയമസഭയില്‍ ഈ വിഷയത്തെ കുറിച്ച് സംസാരിക്കാന്‍ മുന്നോട്ട് വന്നത് സിപിഐ എം പോളിറ്റ് ബ്യൂറോ മെമ്പറും സഭയുടെ പ്രതിപക്ഷ ഉപനേതാവുമായ കോടിയേരി ബാലകൃഷ്ണനാണ്. ഹരിതവാദികളെന്ന് പറയുന്ന കൂട്ടം പോലും ഈ റിപ്പോര്‍ട്ടിനെ കണ്ടില്ലെന്ന് നടിക്കുന്ന ഭാവത്തോടെയാണ് സഭയില്‍ ഇരുന്നത്.
പൊതുതാല്‍പ്പര്യമുള്ള ഈ വിഷയം ചട്ടം 130 അനുസരിച്ച് ഉപക്ഷേപമായി അവതരിപ്പിച്ചത്. മാധവ് ഗാഡ്ഗില്‍ കമ്മറ്റി റിപ്പോര്‍ട്ടിന്റെ അടിസ്ഥാനത്തില്‍ ജീവിതം വഴിമുട്ടും എന്ന് കരുതിയ ജനവിഭാഗത്തിന്് ഇടതുപക്ഷത്തിന്റെ കരുതല്‍ അനുഭവിച്ചറിയാന്‍ സാധിച്ച ഒരു ചരിത്രമുഹൂര്‍ത്തം കൂടിയായി മാറി ഇത്. അതേ സമയം കേരളത്തിന്റെ പരിസ്ഥിതി സംരക്ഷണത്തിന് കാവല്‍ക്കാരായി നില്‍ക്കുന്നത് സിപിഐ എം ആണെന്നും ഈ ചര്‍ച്ച വിളിച്ച് പറഞ്ഞു. ഹരിത എം എല്‍ എമാര്‍ എന്നൊക്കെയുള്ള വിളിപ്പേരുകളില്‍ അഭിരമിക്കുന്നവര്‍ വെറും വെള്ളപിശാചുകള്‍ മാത്രമാണെന്നും ചില ഹിഡന്‍ അജണ്ടകള്‍ നടപ്പിലാക്കാന്‍ വേണ്ടി മാത്രമാണ് ഇവരുടെ ഹരിതസ്നേഹമെന്നും ഇത്തരത്തിലുള്ള വിഷയങ്ങള്‍ ഉയര്‍ന്ന് വരുമ്പോള്‍ പൊതുജനത്തിന് ബോധ്യമാവുന്നു. മാധവ് ഗാഡ്ഗില്‍ കമ്മറ്റി റിപ്പോര്‍ട്ട് നിയമസഭ ചര്‍ച്ച ചെയ്യണം എന്ന ഉപക്ഷേപവും അതിന്റെ ഭാഗമായി നടന്ന ചര്‍ച്ചയും അതിന് നിമിത്തമാവുന്നു.
20-12-2012, കേരള നിയമസഭ
സമയം : 6.30-6.40 pm
കോടിയേരി ബാലകൃഷ്ണന്‍ : “മാധവ് ഗാഡ്ഗില്‍ റിപ്പോര്‍ട്ട് ദൂരവ്യാപകമായ പ്രത്യാഘാതം ഉണ്ടാക്കുന്ന ഒട്ടേറേ നിര്‍ദ്ദേശങ്ങള്‍ ഉള്‍ക്കൊള്ളുന്നതും ജനവാസം പല മേഖലകളിലും അസാധ്യമാക്കുന്നതുമാണ്. ഈ വിഷയം ചര്‍ച്ച ചെയ്യണം” എന്ന ഉപക്ഷേപം അവതരിപ്പിക്കുന്നു.
മുല്ലക്കര രത്നാകരന്‍ : പിന്താങ്ങുന്നു.
കോടിയേരി ബാലകൃഷ്ണന്‍ : മാധവ് ഗാഡ്ഗില്‍ ചെയര്‍മാനായിട്ടുള്ള ഒരു സമിതിയെ കേന്ദ്രഗവണ്‍മെന്റ് പ്രഖ്യാപിച്ചത് 2010 മാര്‍ച്ച് മാസത്തിലാണ്. അന്ന് പരിസ്ഥിതി-വനം വകുപ്പ് മന്ത്രിയായിരുന്ന ജയറാം രമേശാണ് ഈ സമിതിയെ പ്രഖ്യാപിച്ചത്. 2010 ഫെബ്രുവരിയില്‍ നീലഗിരി മലയിലുള്ള കോത്തഗിരി എന്ന സ്ഥലത്ത് നടന്ന പശ്ചിമഘട്ട സംരക്ഷണ ജനകീയ പ്രസ്ഥാനങ്ങളുടെ കൂട്ടായ്മയെ അഭിസംബോധന ചെയ്ത സന്ദര്‍ഭത്തിലാണ് ഇങ്ങനെയൊരു സമിതിയെ നിശ്ചയിക്കാനുള്ള തീരുമാനം ജയറാം രമേശ് പ്രഖ്യാപിച്ചത്. 2011 സെപ്തംബറില്‍ ഗാഡ്ഗില്‍ സമിതി റിപ്പോര്‍ട്ട് സമര്‍പ്പിച്ചിരുന്നു. 2012 മെയ് 23നാണ് റിപ്പോര്‍ട്ട് പരിസ്ഥിതി മന്ത്രാലയം അവരുടെ വെബ്സൈറ്റില്‍ പ്രസിദ്ധീകരിച്ചത്. റിപ്പോര്‍ട്ട് സംബന്ധിച്ച് ഉയര്‍ന്നു വന്നിട്ടുള്ള ആയിരത്തി അഞ്ഞൂറില്‍പ്പരം നിര്‍ദ്ദേശങ്ങള്‍ പഠിക്കാനും വിലയിരുത്താനും പശ്ചിമഘട്ട സംസ്ഥാനങ്ങളെ സംബന്ധിച്ചൊരു പ്രവര്‍ത്തന രേഖ തയ്യാറാക്കാനും കേന്ദ്ര ഗവണ്‍മെന്റ് 2012 ആഗസ്റ് 17 ന് ഡോ.കസ്തൂരിരംഗന്‍ ചെയര്‍മാനായിട്ടുള്ള ഒരു ഒന്‍പതംഗ കമ്മിറ്റിയെ നിശ്ചയിച്ചു. ആ കമ്മിറ്റിക്ക് റണ്ടു മാസത്തെ കാലാവധിയാണ് ആദ്യം കൊടുത്തത്. ഇപ്പോള്‍ അതിന്റെ കാലാധി നാല് മാസം കൂട്ടി നല്‍കിയിട്ടുണ്ട്. ഡോ. കസ്തൂരിരംഗന്‍ ഏതെല്ലാം തരത്തിലുള്ള പരിശോധനകളാണ് നടത്തിയതെന്ന് ഇപ്പോള്‍ ആര്‍ക്കും വേണ്ടത്ര വ്യക്തതയില്ല. കേരളത്തില്‍ വന്നിട്ടില്ലെന്നും വന്നെന്നുമുള്ള വാര്‍ത്തകള്‍ കാണുന്നുണ്ട്. എന്താണ് യഥാര്‍ത്ഥ വസ്തുത? മുഖ്യമന്ത്രിക്ക് ഇത് സംബന്ധിച്ച് അറിവുണ്ടെങ്കില്‍ പറയണം. ഡോ. കസ്തൂരിരംഗന്‍ ഗവണ്‍മെന്റുമായോ, ഇവിടെയുള്ള ഏതെങ്കിലും സമിതിയുമായോ ചര്‍ച്ച ചെയ്തിട്ടുണ്ടോ? ഇത്തരം കാര്യങ്ങള്‍ ഈ സഭയ്ക്കറിയേണ്ടതായുണ്ട്.
ഗാഡ്ഗില്‍ സമിതി റിപ്പോര്‍ട്ടിനകത്ത് പരാമര്‍ശിച്ചിട്ടുള്ള ഒട്ടേറേ കാര്യങ്ങള്‍ പരിസ്ഥിതി സംരക്ഷണത്തെ സംബന്ധിച്ച് പ്രാധാന്യമുള്ളതാണ്. ഇതിന്റെ പ്രധാന പ്രശ്നം ഇത് മനുഷ്യനെ കാണാത്ത റിപ്പോര്‍ട്ടാണെന്നതാണ്. മനുഷ്യവാസം ഇല്ലാതാക്കുന്ന രൂപത്തിലുള്ള ഒരു റിപ്പോര്‍ട്ട് നമ്മുടെ രാജ്യത്ത് എങ്ങനെയാണ് പ്രായോഗികമാക്കുന്നത്. 63 താലൂക്കുകളില്‍ 42 താലൂക്കുകളെ വിവിധ സോണുകളിലായിപ്പെടുത്തി പരിസ്ഥിതിലോലമേഖലയായി റിപ്പോര്‍ട്ടില്‍ ഉള്‍പ്പെടുത്തിയിരിക്കുകയാണ്. അതില്‍ 14 താലൂക്കുകളെയാണ് അതിലോല മേഖലയായി നിരീക്ഷിക്കുന്നത്. ആ താലൂക്കുകളെ ഈ റിപ്പോര്‍ട്ട് വളരെ പ്രതികൂലമായി ബാധിക്കും. 633 തദ്ദേശ സ്വയംഭരണ സ്ഥാപനങ്ങളെയും ഇത് വിഷമ സന്ധിയിലാക്കും. ആലപ്പുഴ ജില്ലയൊഴികെ 13 ജില്ലകള്‍ക്കും ഏറ്റക്കുറച്ചിലോടുകൂടി ബാധമാകുന്ന റിപ്പോര്‍ട്ടാണിത്. ഈ സഭയില്‍ അംഗങ്ങളായിട്ടുള്ള ഒട്ടുമിക്ക എംഎല്‍എമാരുടെയും മണ്ഡലങ്ങളെ ബാധിക്കുന്ന പ്രശ്നമാണ്. പരിസ്ഥിതി സംരക്ഷണത്തിനായി നമ്മുടെ സംസ്ഥാനത്ത് നിയമങ്ങളുണ്ട്. കൂടാതെ കേന്ദ്രനിയമങ്ങളുമുണ്ട്. ഈ നിയമങ്ങള്‍ ഫലപ്രദമായി നടപ്പിലാക്കിയാല്‍ പശ്ചിമഘട്ട സംരക്ഷണം ഉറുപ്പുവരുത്താന്‍ കഴിയും.
ഗാഡ്ഗില്‍ കമ്മറ്റിയുടെ നിര്‍ദ്ദേശങ്ങള്‍ നടപ്പാക്കപ്പെട്ടാല്‍ പശ്ചിമഘട്ട പരിസ്ഥിതി അതോറിറ്റി രൂപീകരിക്കണം. ഗവണ്‍മെന്റിന്റെ മുകളില്‍ മറ്റൊരു ഉപരി ഗവണ്‍മെന്റ് രൂപം കൊള്ളുന്ന സ്ഥിതി വിശേഷമാണ് അപ്പോള്‍ ഉണ്ടാവുക. പശ്ചിമഘട്ടമേഖലയെ പരിസ്ഥിതി പ്രാധാന്യമനുസരിച്ച് മൂന്ന് തരം സോണുകളായി തിരിച്ചതിലാണ് ഏറ്റവും കൂടുതല്‍ അശാസ്ത്രീയത ഉണ്ടായിരിക്കുന്നത്. ഒരു താലൂക്കില്‍ അമ്പത് ശതമാനത്തിലേറെ പ്രദേശം പരിസ്ഥിതി ലോലമാണെന്ന് വിലയിരുത്തുമ്പോള്‍ ആ താലൂക്ക് മൊത്തത്തില്‍ സോണ്‍ ഒന്നില്‍ ഉള്‍പ്പെടുകയാണ്. താലൂക്കടിസ്ഥാനത്തില്‍ വിഭജിക്കുമ്പോള്‍ ഉണ്ടാകുന്ന പ്രശ്നങ്ങളാവും ഇതിന്റെ നടത്തിപ്പില്‍ വന്നുചേരാന്‍ പോകുന്ന പ്രധാന പ്രതിബന്ധം. എക്കോളജിക്കലി സെന്‍സിറ്റീവ് സോണ്‍ (ESZ) എന്ന് നിരീക്ഷിച്ചുകൊണ്ട്് സോണ്‍ ഒന്നില്‍ പെടുന്ന മേഖലയ്ക്ക് അതീവ പരിസ്ഥിതി പ്രാധാന്യം നല്കുകയാണ്. അവിടെ പരിസ്ഥിതി സംരക്ഷണത്തിന് മുന്‍തൂക്കം കൊടുക്കുകയാണ്. യാതൊരു വികസന പ്രവര്‍ത്തനവും പാടില്ല എന്നതാണ് കാഴ്ചപ്പാട്. സോണ്‍ ഒന്നില്‍ നിലവിലുള്ള ദേശീയ ഉദ്യാനങ്ങളും വന്യജീവി സങ്കേതങ്ങളും അതിന് ചുറ്റുമുള്ള ബഫര്‍മേഖലകളും ഇതിന്റെ പരിധിയിലേക്ക് ഉള്‍പ്പെടുത്തിയിരിക്കുന്നു. എന്നാല്‍, രണ്ടാമത്തെ സോണില്‍ ചില നിയന്ത്രണങ്ങളോടു കൂടി വികസന പ്രവര്‍ത്തനമാകാം എന്ന് കമ്മീഷന്‍ പറയുന്നുണ്ട്. മൂന്നാമത് സോണില്‍ ഉള്‍പ്പെടുത്തിയ പ്രദേശങ്ങളില്‍ കുറച്ചുകൂടി അയവ് വരുത്തുന്നുണ്ട്. അവിടെയും നിയന്ത്രണങ്ങളോട് കൂടി വികസന പ്രവര്‍ത്തനം അനുവദിക്കുന്നുണ്ട്.
 |
മുഖ്യമന്ത്രി ഡല്‍ഹിയില്‍പോയപ്പോള്‍ കേന്ദ്ര വനംപരിസ്ഥിതി മന്ത്രിയുമായി നേരിട്ട് സംസാരിക്കുകയും അവിടെ വച്ച് കടുവസങ്കേതമായി പ്രഖ്യാപിക്കാനുള്ള പ്രപ്പോസലില്ലായെന്ന് വളരെ വ്യക്തമായി പറയുകയും ചെയ്തിട്ടുണ്ട്. അത് പറഞ്ഞ് ഒരു ഇഷ്യൂ ഉണ്ടാക്കരുത്. അങ്ങനെയൊന്നില്ലായെന്ന് മുഖ്യമന്ത്രിയും കേന്ദ്രമന്ത്രിയും പറഞ്ഞിട്ടുണ്ട്. അങ്ങേയ്ക്ക് ലഭിച്ച ആ നിവേദനം എനിക്കും ലഭിച്ചിട്ടുണ്ട്. അതില്‍ പറയുന്ന എല്ലാ കാര്യങ്ങളും ശരിയല്ല.
|
ഒന്നാമത്തെ സോണിനകത്ത് ഒന്നും ചെയ്യാന്‍ പാടില്ലെന്നാണ്. ഇടുക്കി ജില്ല സമ്പൂര്‍ണ്ണമായും ആ സോണിലാണ് നിലകൊള്ളുന്നത്. തൊടുപുഴ, ഉടുമ്പന്‍ചോല, ദേവികുളം, പീരുമേട്, താലൂക്ക് തുടങ്ങിയവ ഇതിലുള്‍പ്പെട്ടിരിക്കുന്നു. വയനാട്ടിലെ വൈത്തിരി, മാനന്തവാടി, സുല്‍ത്താന്‍ബത്തേരി താലൂക്കുകളും പത്തനംതിട്ടയിലെ റാന്നി താലൂക്ക്, കണ്ണൂര്‍ ജില്ലയിലെ തലശ്ശേരി, കൊല്ലം ജില്ലയിലെ പുനലൂര്‍, പാലക്കാട് ജില്ലയിലെ മണ്ണാര്‍ക്കാട്, ചിറ്റൂര്‍, തിരുവനന്തപുരത്തെ നെടുമങ്ങാട്, തൃശൂരിലെ ഇരിങ്ങാലക്കുട താലൂക്ക് തുടങ്ങിയവ ഒന്നാമത് സോണില്‍ ഉള്‍പ്പെട്ടിരിക്കുന്നു. ഇവിടങ്ങളില്‍ യാതൊരുവിധ വികസനപ്രവര്‍ത്തനവും പാടില്ല എന്നുള്ള നിലപാട് സ്വീകരിക്കുന്നതില്‍ യുക്തിരാഹിത്യമുണ്ട്. ഈ താലൂക്കുകളിലെ ചില പ്രദേശങ്ങളില്‍ വനമുണ്ട്. അത് സംരക്ഷിക്കണം. അതിന് വനം ഉള്‍ക്കൊള്ളുന്ന വാര്‍ഡുകള്‍ ഒന്നാം സോണില്‍ ഉള്‍പ്പെടുത്തിയാല്‍ മതിയാവും. അതിന് പകരം താലൂക്ക് മുഴുവനായും സോണാക്കി പ്രഖ്യാപിക്കുന്നതാണ് ഈ റിപ്പോര്‍ട്ടിലെ ഗുരുതരമായ പ്രശ്നം. ജനങ്ങള്‍ റിപ്പോര്‍ട്ടിനെതിരെ പ്രതികരിക്കുന്നതും ഇതുകൊണ്ടാണ്.
ഈ റിപ്പോര്‍ട്ടിന്റെ കാഴ്ചപ്പാടില്‍ ജനവാസം പ്രകൃതിക്ക് നിരക്കാത്തതാണ്. പ്രകൃതിയെ തന്നെ രൂപപ്പെടുത്തിയെടുക്കുന്നതില്‍ മനുഷ്യന് പ്രധാനപ്പെട്ട പങ്ക് വഹിച്ചിട്ടുണ്ട്. പരിസ്ഥിതി സംരക്ഷണം ഇന്നത്തെക്കാലത്ത് ഒഴിച്ചുകൂടാനാവാത്തതാണ്. പരിസ്ഥിതി സംരക്ഷിച്ചുകൊണ്ടുള്ള വികസനം എന്നതാവണം നമ്മുടെ കാഴ്ചപ്പാട്. പരിസ്ഥിതി സംരക്ഷണം ലക്ഷ്യം വെച്ച് സമിതി ചൂണ്ടിക്കാണിച്ചിട്ടുള്ള നിര്‍ദ്ദേശങ്ങള്‍ എങ്ങനെ നടപ്പിലാക്കാന്‍ കഴിയും എന്ന് ചര്‍ച്ച ചെയ്ത് ഒരു നിലപാട് എടുക്കേണ്ടതായിട്ടുണ്ട്. എന്നാല്‍, അതിന്റെ പേരില്‍ യാതൊരു വികസനപ്രവര്‍ത്തനവും പാടില്ല എന്ന സമിതിയുടെ നിര്‍ദ്ദേശത്തോട് യോജിക്കാന്‍ സാധിക്കില്ല.
കേരളത്തിന് അനുയോജ്യമായ കാഴ്ചപ്പാട് പരിസ്ഥിതി സംരക്ഷിച്ചുകൊണ്ടുള്ള വികസനപ്രവര്‍ത്തനം എന്നതാണ്. നേരത്തെ പരിസ്ഥിതി സംരക്ഷണത്തെക്കുറിച്ച് വേണ്ടത്ര ആഴത്തിലുള്ള കാഴ്ചപ്പാട് രാഷ്ട്രീയ പാര്‍ട്ടികള്‍ക്ക് ഉണ്ടായിരുന്നില്ല. എന്നാല്‍, ഇപ്പോള്‍ പരിസ്ഥിതി സംരക്ഷണം പ്രധാനപ്പെട്ട അജണ്ടയായി എടുക്കുന്ന തലത്തിലുള്ള പരിസ്ഥിതി അവബോധം നമ്മുടെ രാജ്യത്തെ രാഷ്ട്രീയ പാര്‍ട്ടികളില്‍ വളര്‍ന്ന് വരുന്നുണ്ട്. സിപിഐ എം വളരെ നേരത്തെ തന്നെ പരിസ്ഥിതി സംരക്ഷണം പ്രധാനപ്പെട്ട വിഷയമായി എടുത്തിട്ടുണ്ട്. കഴിഞ്ഞ മൂന്ന് പാര്‍ട്ടി കോണ്‍ഗ്രസുകളില്‍ ഇത് പ്രധാനപ്പെട്ട വിഷയമായി ചര്‍ച്ച ചെയ്തു.
പ്രകൃതിയുടെ സംരക്ഷണത്തെ സംബന്ധിച്ച് 1875ല്‍ ഫ്രെഡറിക് എംഗല്‍സ് എഴുതിയിട്ടുള്ള ഒരു പ്രധാനപ്പെട്ട ലേഖനമുണ്ട്. നൂറ്റാണ്ടുകള്‍ക്ക് മുമ്പ് തന്നെ ‘പ്രകൃതിയുടെ വൈരുദ്ധ്യസ്വഭാവത്തിന് ഒരു മുഖവുര’ എന്ന ആ ലേഖനത്തില്‍ പരിസ്ഥിതി സംരക്ഷണത്തിന്റെ പ്രാധാന്യത്തെ കുറിച്ചാണ് എംഗല്‍സ് ഊന്നിപ്പറഞ്ഞിട്ടുള്ളത്. മനുഷ്യനാണ് പ്രകൃതിയെ രൂപപ്പെടുത്തുന്നതില്‍ സവിശേഷമായ പങ്ക് വഹിക്കുന്നത് എന്ന് പറഞ്ഞുകൊണ്ട് മനുഷ്യനും കൂടി ഉള്‍ക്കൊള്ളുന്ന പ്രകൃതി സംരക്ഷണമാണ് പ്രായോഗികമായിട്ടുള്ളത് എന്ന് എംഗല്‍സ് ചൂണ്ടിക്കാണിക്കുന്നു. “മനുഷ്യന് മാത്രമാണ് പ്രകൃതിയുടെ മേല്‍ സ്വന്തം മുദ്ര പതിപ്പിക്കാന്‍ വിജയകമരായി കഴിഞ്ഞിട്ടുള്ളത്. അവന്‍ സസ്യവര്‍ഗങ്ങളെയും ജന്തുജാതികളെയും ഒരു സ്ഥലത്തു നിന്ന് മറ്റൊരു സ്ഥലത്തേക്ക് മാറ്റി എന്നു മാത്രമല്ല, സ്വന്തം വാസസ്ഥലങ്ങളുടെ കാലാവസ്ഥയേയും മറ്റ് സ്ഥിതിഗതികളേയും പോലും മാറ്റി. അങ്ങനെ അവന്റെ പ്രവൃത്തികളുടെ ഭവിഷ്യത്തുകള്‍ ഭൂഗോളത്തിന്റെ പൊതുനാശത്തോടു കൂടി മാത്രമേ തിരോഭവിക്കുകയുള്ളു എന്ന സ്ഥിതി വന്നിരിക്കുന്നു.” പ്രകൃതിയെ മനുഷ്യന് ചൂഷണം ചെയ്യുന്ന അവസ്ഥയെ സംബന്ധിച്ച് നൂറ്റാണ്ടുകള്‍ക്ക് മുമ്പ് കമ്യൂണിസ്റ് ആചാര്യനായ ഫ്രെഡറിക്ക് എംഗല്‍സ്് നടത്തിയിട്ടുള്ള വിശകലനം ഇന്നും പ്രസക്തമാണ്. ഇന്ന് പ്രകൃതിയെ ചൂഷണം ചെയ്യുന്നതിന് നേതൃത്വം നല്കുന്നത് മുതലാളിത്തമാണ്. ചൂഷണത്തിലൂടെ ധനം സമ്പാദിക്കാനുള്ള അത്യാര്‍ത്തിയാണ് അവരെ നയിക്കുന്നത്. നദികളിലെ മണല്‍ വാരുന്നു. മണല്‍മാഫിയകളെ സൃഷ്ടിച്ച് സംരക്ഷിക്കുന്നു. പ്രകൃതിയുടെ മഴവെള്ള സംഭരണികൂടിയായ നെല്‍വയലുകള്‍ നികത്തുന്നു. നിയമങ്ങളെ മറികടന്ന് ഖനനങ്ങള്‍ നടത്തുന്നു. പാറ പൊട്ടിക്കല്‍ വ്യാപകമാകുമ്പോള്‍ ഉരുള്‍പൊട്ടല്‍ തുടര്‍ക്കഥയായി മാറുന്നു. യാതൊരു മാനദണ്ഡങ്ങളും പാലിക്കാതെ സിമന്റ് കാടുകള്‍ വെച്ച് പിടിപ്പിക്കുന്നു. മരങ്ങള്‍ വെട്ടി നശിപ്പിച്ച് റിയല്‍ എസ്റേറ്റ് മാഫിയ ഭൂമി കൈയ്യേറുന്നു. ഭൂമിയുടെ ഘടന തന്നെ മാറിപ്പോവുന്ന വിധത്തിലുള്ള കൈയ്യേറ്റം. പല രാജ്യങ്ങളിലും അവിടുത്തെ ഭൂഘടന മാറ്റിമറിച്ചുകൊണ്ടുളള ഒരു നിര്‍മാണപ്രവര്‍ത്തനവും അനുവദിക്കുന്നില്ല. ഒരു പ്രദേശത്തിന്റെ പ്രകൃതിദത്തമായ ഭൂഘടനയ്ക്കനുസരിച്ചുള്ള ശാസ്ത്രീയമായ നിര്‍മാണപ്രവര്‍ത്തനങ്ങള്‍ മാത്രം അനുവദിക്കുന്നു.
 |
കോസ്റ്റല്‍ റെഗുലേഷന്‍ സോണ്‍ നടപ്പിലാക്കിയ സമയത്ത് ഒരു ഇടപെടല്‍ ഉണ്ടാകാത്തതിന്റെ ദുരന്തം നമ്മള്‍ അനുഭവിച്ചുകൊണ്ടിരിക്കുകയാണ്. തീരപ്രദേശത്ത് കോസ്റ്റല്‍ റഗുലേഷന്‍ സോണ്‍ നടപ്പിലാക്കിയ സമയത്ത് CRZ ആക്ട് ആവാസവ്യവസ്ഥയെ ബാധിക്കില്ലെന്നാണ് പറഞ്ഞിരുന്നത്. എന്നാല്‍, ആവാസവ്യവസ്ഥയെ ബാധിക്കുന്ന വിധം CRZ ആക്ട് മാറിയിരിക്കുന്നു. യഥാസമയം വേണ്ടരീതിയില്‍ ഇടപെടാത്തതുകൊണ്ടാണ് ഇത് സംഭവിച്ചത്. അതുകൊണ്ട് ഇവിടെ ഒരു ഇടപെടല്‍ ആവശ്യമല്ലെ?
|
കേരളത്തില്‍ മലയിടിക്കുന്നു, കുന്നുകള്‍ ഇല്ലാതാക്കുന്നു. അവിടങ്ങളിലെ മണ്ണ് മറ്റൊരു സ്ഥലത്ത് നിക്ഷേപിക്കുന്നു. പ്രകൃതിദത്തമായ ഭൂഘടനയെ അട്ടിമറിക്കുന്നതിന്റെ ഫലമായി പാരിസ്ഥിതികമായ അസന്തുലിതാവസ്ഥയുണ്ടാവുന്നു. കാലാവസ്ഥ വ്യതിയാനം വരെ സംഭവിക്കുന്നു. കേരളത്തെ സമ്പൂര്‍ണ്ണ വരള്‍ച്ച ബാധിതപ്രദേശമായി പ്രഖ്യാപിച്ചത് ഇന്നലെയാണ്. ഇത്തരമൊരു സാഹചര്യത്തില്‍ തീര്‍ച്ചയായും പരിസ്ഥിതി സംരക്ഷണം അനിവാര്യമാണ്. ഗാഡ്ഗില്‍ റിപ്പോര്‍ട്ടിനകത്ത് ചൂണ്ടിക്കാണിക്കുന്ന പരിസ്ഥിതി സംരക്ഷണത്തിനായുള്ള നിര്‍ദേശങ്ങളെ അന്ധമായി വിയോജിക്കാന്‍ പാടില്ല. നമ്മള്‍ അന്വേഷിക്കേണ്ടത് പരിസ്ഥിതിയെ സംരക്ഷിച്ചു കൊണ്ടുള്ള വികസനപ്രവര്‍ത്തനങ്ങള്‍ എങ്ങനെ സാധിക്കുമെന്നാണ്. ചില കേന്ദ്രങ്ങള്‍ പറയുന്നത് ഈ റിപ്പോര്‍ട്ട് അതേപടി തള്ളിക്കളയണമെന്നാണ്. അതിനോട് ഞങ്ങള്‍ യോജിച്ചിക്കുന്നില്ല. പരിസ്ഥിതി സംരക്ഷണത്തോട് നമ്മള്‍ വിയോജിക്കുന്നില്ല. എന്നാല്‍, പരിസ്ഥിതി സംരക്ഷണം എന്ന് പറഞ്ഞ് മനുഷ്യരുടെ ജീവിതത്തെ തന്നെ ഇല്ലാതാക്കുന്ന ഒരവസ്ഥ സംജാതമാവാനും പാടില്ല.
ഈ റിപ്പോര്‍ട്ട് അതേപടി നടപ്പിലാക്കുകയാണെങ്കില്‍ പുതിയ ജലവൈദ്യുത പദ്ധതികള്‍ സാധ്യമാകാതെ വരും. മുപ്പത്- അമ്പത് വര്‍ഷം പഴക്കമുള്ള ജലവൈദ്യുതി പദ്ധതികളും ഡാമുകളുമൊക്കെ ഡി കമ്മീഷന്‍ ചെയ്യേണ്ടതായി വരും. അങ്ങനെ വന്നാല്‍ 350 മെഗാവാട്ടിന്റെ ശബരിഗിരി പദ്ധതി ഡി കമ്മീഷന്‍ ചെയ്യേണ്ടതായി വരും. കക്കാട്, മണിയാര്‍, പെരിനാട് തുടങ്ങിയ പദ്ധതികളും ഡി കമ്മീഷന്‍ ചെയ്യപ്പെടും മുല്ലപ്പെരിയാര്‍ ഡാം പൊളിക്കേണ്ടി വരും. ഏറ്റവും കൂടുതല്‍ വിദ്യുച്ഛക്തി ഉത്പാദിപ്പിക്കുന്ന ഇടുക്കി ഡാം പൊളിക്കേണ്ടതായി വരും. പുതിയ ഡാമുകള്‍ പാടില്ലെന്നും നിലവിലുള്ള ഡാമുകള്‍ പൊളിച്ചുമാറ്റണമെന്നുമുള്ള നിര്‍ദ്ദേശങ്ങളോട് യോജിക്കാന്‍ കഴിയില്ല. കാറ്റില്‍ നിന്നുള്ള വൈദ്യുതി ഉല്പാദനം പോലും ഇതിന്റെ ഭാഗമായി സാധ്യമല്ലാതെ വരും. വിദ്യുച്ഛക്തി ഉല്‍പ്പാദനമേഖലയില്‍ പ്രതിസന്ധിയുണ്ടാകും. റെയില്‍ പദ്ധതികള്‍ പാടില്ല എന്നും റിപ്പോര്‍ട്ടില്‍ പറയുന്നുണ്ട്. നിലമ്പൂര്‍-നഞ്ചന്‍കോട് റെയില്‍വേ ലൈന്‍, തലശ്ശേരി-മൈസൂര്‍ പാത, ശബരിപാത തുടങ്ങിയവയും ഈ റിപ്പോര്‍ട്ട് പ്രകാരം സാധ്യമാക്കാന്‍ കഴിയില്ല. മലയോര ഹൈവേക്കും റിപ്പോര്‍ട്ട് തടസമാകും. ഇത് വികസനരംഗത്ത് പ്രതിസന്ധി ഉണ്ടാക്കും. ഇടുക്കി, വയനാട്, പത്തനംതിട്ട ജില്ലകളുടെ വികസനത്തിന് തിരിച്ചടിയാവും. കേരളത്തിന്റെ പൊതുവികസനത്തെ വിനാശകരമായി ബാധിക്കും. അത്തരം കാര്യങ്ങളാണ് ഈ റിപ്പോര്‍ട്ടിലുള്ള പ്രധാന പ്രശ്നങ്ങള്‍. അതുകൊണ്ട് വികസനത്തിന് തടസ്സമായി നില്‍ക്കുന്ന നിര്‍ദ്ദേശങ്ങള്‍ ഉള്‍ക്കൊള്ളണം എന്ന് പറഞ്ഞാല്‍ അത് സാധിക്കില്ല.
പാലോട് രവി എം എല്‍ എ ഇടപെടുന്നു.
പാലോട് രവി : അങ്ങിവിടെ സംസാരിച്ചപ്പോള്‍ സൂചിപ്പിച്ചത് 2010 മാര്‍ച്ച് 14 നാണ് ഇത്തരത്തില്‍ ഒരു പാനല്‍ ഇവിടെ നിലവില്‍ വരുന്നത് എന്നാണ്. 2011 സെപ്തംബറിലാണ് ആ പാനല്‍ റിപ്പോര്‍ട്ട് നല്കുന്നത്. എന്റെ ചോദ്യം 2010ല്‍ പാനല്‍ ഉണ്ടാക്കുമ്പോള്‍ അതില്‍ കേരളത്തില്‍ നിന്ന് രണ്ടുപേരുണ്ടായിരുന്നു. ആ കാലഘട്ടത്തില്‍ ഇടത് ഗവണ്‍മെന്റായിരുന്നു ഏതെങ്കിലും ഒരു ഘട്ടത്തില്‍ ഈ രണ്ട് അംഗങ്ങളെ പാനലില്‍ ഉള്‍പ്പെടുത്തുന്നതിന് കേരള ഗവണ്‍മെന്റുമായി ആലോചിച്ചിട്ടുണ്ടോ? നിങ്ങളിരിക്കുന്ന കാലഘട്ടത്തിലാണ് ഈ റിപ്പോര്‍ട്ട് സമര്‍പ്പിക്കുന്നത്. ആ സമയത്ത് ഇതിലെ അംഗങ്ങളുമായോ, ഗാഡ്ഗിലുമായോ കേരള ഗവണ്‍മെന്റ് ഏതെങ്കിലും ഘട്ടത്തില്‍ ചര്‍ച്ച നടത്തിയിട്ടുണ്ടോ?
കോടിയേരി ബാലകൃഷ്ണന്‍ : അന്ന് സംസ്ഥാനത്ത് മന്ത്രിയായിരുന്ന എ. കെ. ബാലനും കേന്ദ്രത്തില്‍ പരിസ്ഥിതി കൈകാര്യം ചെയ്യുന്ന മന്ത്രി ജയറാം രമേശും തമ്മില്‍ ഈ പ്രശ്നത്തിന്റെ പേരിലുണ്ടായ വാദപ്രതിവാദം ഏവര്‍ക്കും ഓര്‍മയുണ്ടാകുമെന്ന് കരുതുന്നു. സംസ്ഥാന സര്‍ക്കാരിന് സാധിക്കുന്ന വിധത്തിലൊക്കെ ഇടപെടാനും എതിര്‍പ്പ് പ്രകടിപ്പിക്കേണ്ട വേദികളില്‍ തുറന്ന് പറയാനും ഇടതുപക്ഷ ഗവണ്‍മെന്റിന് സാധിച്ചിട്ടുണ്ട്. ഇപ്പോള്‍ അത് പ്രായോഗികമാക്കുന്ന സ്ഥിതി വന്നാല്‍ ഉണ്ടാകാനിടയുള്ള പ്രശ്നങ്ങളാണ് ചൂണ്ടിക്കാണിക്കുന്നത്.
ആരാധനാലയങ്ങള്‍ക്കും റിപ്പോര്‍ട്ട് വിലക്കേര്‍പ്പെടുത്തുന്നുണ്ട്. പള്ളികളും ക്ഷേത്രങ്ങളുമൊന്നും പുതുതായി നിര്‍മിക്കാന്‍ പാടില്ല. അവയുടെ പുനരുദ്ധാരണ പ്രവര്‍ത്തനങ്ങളും പൂര്‍ണ്ണമായും അവസാനിപ്പിക്കേണ്ടി വരും. സ്കൂളുകള്‍ നവീകരിക്കാന്‍ സാധിക്കില്ല. സ്കൂളുകളും കോളേജുകളും പുതുതായി സ്ഥാപിക്കാന്‍ സാധിക്കില്ല. കൃഷി സമ്പ്രദായങ്ങളിലും സമ്പൂര്‍ണ്ണമായ മാറ്റം വേണ്ടിവരും. റബ്ബര്‍കൃഷി അടക്കമുള്ള നാണ്യവിളകളെ സമ്പൂര്‍ണ്ണമായി തകര്‍ക്കുന്ന വിധത്തില്‍ പരമ്പരാഗതമായ കൃഷി സമ്പ്രദായങ്ങളിലേക്ക് തിരിച്ചുപോകണമെന്ന നിര്‍ദേശവും ഈ റിപ്പോര്‍ട്ടിലുണ്ട്. എന്നാല്‍, റിപ്പോര്‍ട്ടിലെ ചില നിര്‍ദേശങ്ങള്‍ നല്ലതുമാണ്. തോട്ടങ്ങളില്‍ അഞ്ച് ശതമാനം വരെ ഭൂമി കാര്‍ഷിക വിളകള്‍ക്കോ, ഔഷധ സസ്യകൃഷിക്കോ, പച്ചക്കറി/പൂന്തോട്ട കൃഷിക്കോ, വിനോദസഞ്ചാര പദ്ധതികള്‍ക്കോ ഉപയോഗിക്കാന്‍ അനുവദിക്കാമെന്ന് നിയമമുണ്ടാക്കിയ ഈ സര്‍ക്കാരിന്റെ ഇത്തരത്തിലുള്ള പദ്ധതികളൊന്നം ഈ റിപ്പോര്‍ട്ട് പ്രകാരം നടപ്പിലാക്കാന്‍ സാധിക്കില്ല. റിയല്‍ എസ്റേറ്റ് മാഫിയക്കും അവരെ വളര്‍ത്തുന്ന യു ഡി എഫ് സര്‍ക്കാരിനും തടയിടുന്ന ഈ നിര്‍ദേശം സ്വാഗതാര്‍ഹമാണ്. പൊതുഭൂമി സ്വകാര്യമേഖലയ്ക്ക് കൊടുക്കാന്‍ പാടില്ല എന്ന നിര്‍ദ്ദേശവും ഞങ്ങള്‍ അംഗീകരിക്കുന്നു.
 |
കസ്തൂരിരംഗന്‍ കേരളത്തില്‍ വന്നിട്ടില്ലല്ലോ. കസ്തൂരി രംഗന്‍ ആരെയാണ് കണ്ടത്? ഈ നിമിഷം വരെ ആരെയെങ്കിലും ഏതെങ്കിലും പൊതുപ്രവര്‍ത്തകനെയോ, ത്രിതലപഞ്ചായത്ത് മെമ്പര്‍മാരെയോ കണ്ടിട്ടുണ്ടോ? ഗാഡ്ഗില്‍ കമ്മിറ്റിയുടെ റിപ്പോര്‍ട്ട് കൊടുക്കുന്നതിന് മുമ്പ് ജനപ്രതിനിധികളില്‍ ആരെയെങ്കിലും കണ്ടിട്ടുണ്ടോ? ഈ സ്റേറ്റിലെ ത്രിതല പഞ്ചായത്ത് മെമ്പര്‍മാരെ കണ്ടിട്ടുണ്ടോ? ആരോടും ചോദിക്കാതെ എങ്ങനെയാണ് റിപ്പോര്‍ട്ട് കൊടുക്കുന്നത്? ആ റിപ്പോര്‍ട്ടിനോടുള്ള സമീപനം എന്തായിരിക്കുമെന്നുള്ളതിനെ സംബന്ധിച്ച് ചര്‍ച്ച ചെയ്യണമെന്നാണ് എന്റെ അഭിപ്രായം.
|
ഈ റിപ്പോര്‍ട്ടില്‍ പറയുന്ന ഓരോ നിര്‍ദ്ദേശങ്ങളും പരിശോധിച്ചുകൊണ്ട് നിലപാട് സ്വീകരിക്കുന്നില്ലെങ്കില്‍ പ്രത്യാഘാതങ്ങളുണ്ടാവും. ഇത് സംബന്ധിച്ച് മലയോര മേഖലകളില്‍ വ്യാപകമായി ആശങ്ക ഉയര്‍ന്നുവന്നിട്ടുണ്ട്. ഇന്ന് രാവിലെ മുതല്‍ ഇടുക്കിയിലെ ജനങ്ങള്‍ അണിനിരക്കുന്ന സര്‍വ്വകക്ഷി സമരം രക്തസാക്ഷി മണ്ഡപത്തിന്റെ മുമ്പില്‍ നടക്കുന്നുണ്ട്. വയനാട്ടില്‍ കഴിഞ്ഞ ദിവസം വലിയ ഒരു ജനകീയകൂട്ടായ്മ സംഘടിപ്പിച്ചിരുന്നു. അവിടെയും ജനങ്ങള്‍ പ്രതിഷേധിക്കുകയാണ്. വന്യജീവികളുടെ ആവാസം വന്യജീവികള്‍ക്ക് വിഹരിക്കാനുള്ള ഇടമായി സുഗമമായി വയ്ക്കണമെന്നാണ് റിപ്പോര്‍ട്ടില്‍ പറയുന്നത്. എനിക്ക് കഴിഞ്ഞ ദിവസം ഒരു നിവേദനം ലഭിച്ചിരുന്നു. അതില്‍ പറയുന്നത്: കുമളി കടുവാ സങ്കേതത്തിലും മതികെട്ടാന്‍ ചോലയ്ക്കുമിടയിലുള്ള ഏഴ് പഞ്ചായത്തുകളെ കമ്മ്യൂണിറ്റി റിസര്‍വെന്ന പേരില്‍ വന്യജീവി ഇടനാഴിയാക്കുവാന്‍ ഗാഡ്ഗില്‍ റിപ്പോര്‍ട്ട് ശുപാര്‍ശചെയ്യുന്നു എന്ന ആക്ഷേപമാണ്. ഇത്തരം പ്രദേശങ്ങളിലെ മനുഷ്യര്‍ വന്യജീവികള്‍ക്കുവേണ്ടി ഇടനാഴികള്‍ സൃഷ്ടിക്കുമ്പോള്‍ ഒഴിഞ്ഞുപോകാന്‍ നിര്‍ബന്ധിതരാവും. വയനാട് ജില്ല കടുവയ്ക്ക് വേണ്ടി വിട്ടുകൊടുക്കണമെന്നും റിപ്പോര്‍ട്ടില്‍ പറയുന്നുണ്ട്. അവിടെ മനുഷ്യര്‍ വേണ്ട കടുവ മതി. കടുവാ സങ്കേതമായി പ്രഖ്യാപിക്കും.
വനം മകുപ്പ് മന്ത്രി കെ ബി ഗണേഷ്കുമാര്‍ ഇടപെടുന്നു
വനവും സ്പോര്‍ട്സും സിനിമയും വകുപ്പുമന്ത്രി കെ. ബി. ഗണേഷ്കുമാര്‍: മുഖ്യമന്ത്രിയും വനംവകുപ്പു മന്ത്രിയെന്ന നിലയില്‍ ഞാനും ഒപ്പിട്ടൊരു പത്രക്കുറിപ്പു കൊടുത്തിരുന്നു. കൂടാതെ മുഖ്യമന്ത്രി ഡല്‍ഹിയില്‍പോയപ്പോള്‍ കേന്ദ്ര വനംപരിസ്ഥിതി മന്ത്രിയുമായി നേരിട്ട് സംസാരിക്കുകയും അവിടെ വച്ച് കടുവസങ്കേതമായി പ്രഖ്യാപിക്കാനുള്ള പ്രപ്പോസലില്ലായെന്ന് വളരെ വ്യക്തമായി പറയുകയും ചെയ്തിട്ടുണ്ട്. അത് പറഞ്ഞ് ഒരു ഇഷ്യൂ ഉണ്ടാക്കരുത്. അങ്ങനെയൊന്നില്ലായെന്ന് മുഖ്യമന്ത്രിയും കേന്ദ്രമന്ത്രിയും പറഞ്ഞിട്ടുണ്ട്. അങ്ങേയ്ക്ക് ലഭിച്ച ആ നിവേദനം എനിക്കും ലഭിച്ചിട്ടുണ്ട്. അതില്‍ പറയുന്ന എല്ലാ കാര്യങ്ങളും ശരിയല്ല.
കോടിയേരി ബാലകൃഷ്ണന്‍ : പൊതുവില്‍ ജനങ്ങളെ ആശങ്കയിലാഴ്ത്തുന്ന ഇത്തരത്തിലുള്ള ധാരാളം പ്രശ്നങ്ങള്‍ ഇതിന്റെ ഭാഗമായി ഉയര്‍ന്ന് വന്നിട്ടുണ്ട് എന്നത് വസ്തുതയാണ്. ഒന്നാമതായി ഈ റിപ്പോര്‍ട്ട് മലയാളത്തില്‍ ആര്‍ക്കും ലഭിച്ചിട്ടില്ല. ബയോ ഡൈവേഴ്സിറ്റി ബോര്‍ഡിന്റെ റിപ്പോര്‍ട്ടിന്റെ കോപ്പി മുഖ്യമന്ത്രി ഇന്ന് രാവിലെ എനിക്ക് തന്നു. ഇത് സംബന്ധിച്ചുള്ള വിശദാംശങ്ങള്‍ എം.എല്‍.എമാര്‍ മാത്രം അറിഞ്ഞാല്‍ പോരാ. നാട്ടിലെ മുഴുവന്‍ ജനങ്ങളും മനസിലാക്കണം. ഈ റിപ്പോര്‍ട്ട് പരസ്യപ്പെടുത്തി ജനങ്ങളുടെ ആശങ്കകള്‍ അകറ്റണം. ഉള്ളതും ഇല്ലത്തതും ഇതിന്റെ ഭാഗമായി പ്രചരിപ്പിക്കുന്നുണ്ട്. ചില കേന്ദ്രങ്ങള്‍ അച്ചടിച്ചിരിക്കുന്ന ലഘുലേഖകള്‍ പരിശോധിക്കുമ്പോള്‍ അവയിലെ വിശദാംശങ്ങള്‍ക്ക് റിപ്പോര്‍ട്ടുമായി ബന്ധമില്ലെന്ന് മനസിലാവും. യഥാര്‍ത്ഥ വസ്തുത എന്താണെന്നുള്ളത് ജനങ്ങളെ അറിയിക്കാന്‍ മടിച്ച് നിന്നാല്‍ സംസ്ഥാനത്ത് ആരോഗ്യകരമല്ലാത്ത സ്ഥിതിവിശേഷങ്ങളുണ്ടാവും.
അബ്ദുറബിമാന്‍ രണ്ടത്താണി എം എല്‍ എ ഇടപെടുന്നു.
അബ്ദുറബിമാന്‍ രണ്ടത്താണി : കോസ്റ്റല്‍ റെഗുലേഷന്‍ സോണ്‍ നടപ്പിലാക്കിയ സമയത്ത് ഒരു ഇടപെടല്‍ ഉണ്ടാകാത്തതിന്റെ ദുരന്തം നമ്മള്‍ അനുഭവിച്ചുകൊണ്ടിരിക്കുകയാണ്. തീരപ്രദേശത്ത് കോസ്റ്റല്‍ റഗുലേഷന്‍ സോണ്‍ നടപ്പിലാക്കിയ സമയത്ത് CRZ ആക്ട് ആവാസവ്യവസ്ഥയെ ബാധിക്കില്ലെന്നാണ് പറഞ്ഞിരുന്നത്. എന്നാല്‍, ആവാസവ്യവസ്ഥയെ ബാധിക്കുന്ന വിധം CRZ ആക്ട് മാറിയിരിക്കുന്നു. യഥാസമയം വേണ്ടരീതിയില്‍ ഇടപെടാത്തതുകൊണ്ടാണ് ഇത് സംഭവിച്ചത്. അതുകൊണ്ട് ഇവിടെ ഒരു ഇടപെടല്‍ ആവശ്യമല്ലെ?
കോടിയേരി ബാലകൃഷ്ണന്‍ : അങ്ങനെയൊരു ഇടപെടല്‍ അടിയന്തിരമായി വേണമെന്നുള്ളതുകൊണ്ടാണ് ഈ പ്രമേയത്തിന് ഞാന്‍ നോട്ടീസ് കൊടുത്തത്. കോസ്റ്റല്‍ റെഗുലേഷന്‍ സോണ്‍ വന്ന സന്ദര്‍ഭത്തില്‍ നമുക്ക് വളരെയധികം ബുദ്ധിമുട്ടുണ്ടായി. തീരദേശങ്ങളില്‍ ഒരു കാര്യവും അനുവദിക്കില്ല. തീരദേശങ്ങളുള്ള മണ്ഡലങ്ങളിലെ എം.എല്‍.എ. മാര്‍ക്ക് അതിന്റെ പ്രയാസം ശരിക്കും മനസ്സിലാവും.
ചീഫ് വിപ്പ് പിസി ജോര്‍ജ്ജ് ഇടപെടുന്നു.
 |
ആറ് സംസ്ഥാനങ്ങള്‍ ഇതിലെ പരാമര്‍ശങ്ങള്‍ക്കെതിരായി എതിര്‍പ്പ് അറിയിച്ചിട്ടുണ്ട്. അതിനെതുടര്‍ന്നാണ് ഡോ. കസ്തൂരി രംഗന്‍ ചെയര്‍മാനായിട്ടുള്ള അനോമലികള്‍ പരിഹരിക്കുവാനുള്ള കമ്മിറ്റികള്‍ വച്ചത്. ആ കമ്മിറ്റിയുടെ പ്രവര്‍ത്തനങ്ങള്‍ ആരംഭിച്ചിട്ടില്ല. ആ കമ്മിറ്റി പ്രവര്‍ത്തനം ആരംഭിച്ച് എല്ലാ സംസ്ഥാനങ്ങളും സന്ദര്‍ശിച്ച് അതാത് ഗവണ്‍മെന്റുകളുമായി ചര്‍ച്ച ചെയ്തതിനുശേഷം അവര്‍ കൊടുക്കുന്ന റിപ്പോര്‍ട്ട് കൂടി പരിഗണിച്ചുകൊണ്ടേ കേന്ദ്രഗവണ്‍മെന്റ് ഒരു തീരുമാനത്തില്‍ എത്തുകയുള്ളു. അതിനു മുമ്പേ നമ്മുടെ സംസ്ഥാനം മുഴുവനും പശ്ചിമഘട്ട മലനിരകള്‍ മുഴുവനും പരിഭ്രമമുണ്ടാക്കാന്‍, കിംവദന്തി ഉണ്ടാക്കാനുള്ള ശ്രമത്തെ ചെറുക്കണം.
|
പി. സി ജോര്‍ജ്ജ് : ഈ റിപ്പോര്‍ട്ട് കേന്ദ്ര ഗവണ്‍മെന്റിന് കൊടുത്തു. കേന്ദ്ര ഗവണ്‍മെന്റ് ഒരു കമ്മീഷനെ നിയമിച്ചു. പരിസ്ഥിതി പ്രവര്‍ത്തകന്‍ ഗ്രീന്‍ ട്രൈബ്യൂണലില്‍ കേസ് കൊടുത്തിരിക്കുകയാണ്. റിപ്പോര്‍ട്ടില്‍ പറഞ്ഞിട്ടുള്ള കാര്യങ്ങളെല്ലാം നടപ്പിലാക്കിക്കൊണ്ടിരി ക്കുകയാണ്. ഗവണ്‍മെന്റ് ഓര്‍ഡറില്ലാതെ ഗ്രീന്‍ ട്രൈബ്യൂണല്‍ എങ്ങനെ ഇടപെടും. അത് ഗവണ്‍മെന്റിലേക്ക് നോട്ടീസായിരിക്കുകയാണ്. ഇതിന്റെ പുറകില്‍ നടക്കുന്ന കളി കൂടി ഈ സഭ അറിയാന്‍ വേണ്ടി ഇത്രയും പറഞ്ഞുവെന്നേയുള്ളു.
കോടിയേരി ബാലകൃഷ്ണന്‍ : ചീഫ് വിപ്പ് പറയുന്നത് ശരിയാണെങ്കില്‍ വളരെ ഗൌരവമുള്ള പ്രശ്നമാണിത്. ഏതെങ്കിലും പരിസ്ഥിതി പ്രവര്‍ത്തകനോ മറ്റാരെങ്കിലുമോ ഈ റിപ്പോര്‍ട്ട് അതേപടി നടപ്പിലാക്കണമെന്ന് സുപ്രീംകോടതിയ സമീപിച്ചാല്‍ ഗ്രീന്‍ ബെഞ്ചിനെക്കൊണ്ട് നടപ്പാക്കപ്പെടുന്ന സാഹചര്യം വരും. അത് അതേപടി നടപ്പാക്കപ്പെട്ടാല്‍ ഗുരുതരമായ പ്രത്യാഘാതമുണ്ടാകും. ഈയൊരവസ്ഥയില്‍ പരിസ്ഥിതിക്ക് അനുകൂലമായിട്ടുള്ള ഭാഗങ്ങള്‍ അംഗീകരിച്ചും ബാക്കി ഭാഗങ്ങളോട് വിയോജിച്ചും ഒരു നിലപാട് സ്വീകരിക്കുകയും അക്കാര്യങ്ങള്‍ സുപ്രീം കോടതിയെ കൂടി ബോധ്യപ്പെടുത്തുകയും വേണം. അല്ലെങ്കില്‍ ദൂരവ്യാപകമായ പ്രത്യാഘാതങ്ങളാണ് ഉണ്ടാവുക. മലയോരത്തുള്ളവര്‍ ഇറങ്ങിപ്പോകേണ്ടി വരുമെന്ന സംശയം ജനങ്ങളിലുണ്ട്. ഈ സംശയം ദുരീകരിക്കാനായി സംസ്ഥാന ഗവണ്‍മെന്റ് ഇടപെടണം. ബന്ധപ്പെട്ടവരെ സമീപിക്കണം. ഇപ്പോള്‍ വിശദമായി വിലയിരുത്തുന്നതിന് വേണ്ടി ഡോ. കസ്തൂരി രംഗന്‍ കമ്മറ്റിയെ നിയോഗിച്ചിട്ടുണ്ടല്ലൊ. കസ്തൂരി രംഗന്‍ ഇവിടെ ആരെയെങ്കിലും കണ്ടിട്ടുണ്ടോയെന്ന് എനിക്കറിയില്ല. ചീഫ് വിപ്പ് പി സി ജോര്‍ജ്ജിനെ കണ്ടോ?
പി സി ജോര്‍ജ്ജ് : കസ്തൂരിരംഗന്‍ കേരളത്തില്‍ വന്നിട്ടില്ലല്ലോ. കസ്തൂരി രംഗന്‍ ആരെയാണ് കണ്ടത്? ഈ നിമിഷം വരെ ആരെയെങ്കിലും ഏതെങ്കിലും പൊതുപ്രവര്‍ത്തകനെയോ, ത്രിതലപഞ്ചായത്ത് മെമ്പര്‍മാരെയോ കണ്ടിട്ടുണ്ടോ? ഗാഡ്ഗില്‍ കമ്മിറ്റിയുടെ റിപ്പോര്‍ട്ട് കൊടുക്കുന്നതിന് മുമ്പ് ജനപ്രതിനിധികളില്‍ ആരെയെങ്കിലും കണ്ടിട്ടുണ്ടോ? ഈ സ്റേറ്റിലെ ത്രിതല പഞ്ചായത്ത് മെമ്പര്‍മാരെ കണ്ടിട്ടുണ്ടോ? ആരോടും ചോദിക്കാതെ എങ്ങനെയാണ് റിപ്പോര്‍ട്ട് കൊടുക്കുന്നത്? ആ റിപ്പോര്‍ട്ടിനോടുള്ള സമീപനം എന്തായിരിക്കുമെന്നുള്ളതിനെ സംബന്ധിച്ച് ചര്‍ച്ച ചെയ്യണമെന്നാണ് എന്റെ അഭിപ്രായം.
വി ഡി സതീശന്‍ എം എല്‍ എ ഇടപെടുന്നു
വി ഡി സതീശന്‍ : ഗാഡ്ഗില്‍ കമ്മിറ്റി റിപ്പോര്‍ട്ട് കേന്ദ്രഗവണ്‍മെന്റ് അക്സെപ്റ്റ് ചെയ്തിട്ടില്ലായെന്ന യാഥാര്‍ത്ഥ്യം നമ്മള്‍ അറിയണം. മാത്രമല്ല, ആറ് സംസ്ഥാനങ്ങള്‍ ഇതിലെ പരാമര്‍ശങ്ങള്‍ക്കെതിരായി എതിര്‍പ്പ് അറിയിച്ചിട്ടുണ്ട്. അതിനെതുടര്‍ന്നാണ് ഡോ. കസ്തൂരി രംഗന്‍ ചെയര്‍മാനായിട്ടുള്ള അനോമലികള്‍ പരിഹരിക്കുവാനുള്ള കമ്മിറ്റികള്‍ വച്ചത്. ആ കമ്മിറ്റിയുടെ പ്രവര്‍ത്തനങ്ങള്‍ ആരംഭിച്ചിട്ടില്ല. ആ കമ്മിറ്റി പ്രവര്‍ത്തനം ആരംഭിച്ച് എല്ലാ സംസ്ഥാനങ്ങളും സന്ദര്‍ശിച്ച് അതാത് ഗവണ്‍മെന്റുകളുമായി ചര്‍ച്ച ചെയ്തതിനുശേഷം അവര്‍ കൊടുക്കുന്ന റിപ്പോര്‍ട്ട് കൂടി പരിഗണിച്ചുകൊണ്ടേ കേന്ദ്രഗവണ്‍മെന്റ് ഒരു തീരുമാനത്തില്‍ എത്തുകയുള്ളു. അതിനു മുമ്പേ നമ്മുടെ സംസ്ഥാനം മുഴുവനും പശ്ചിമഘട്ട മലനിരകള്‍ മുഴുവനും പരിഭ്രമമുണ്ടാക്കാന്‍, കിംവദന്തി ഉണ്ടാക്കാനുള്ള ശ്രമത്തെ ചെറുക്കണം. ആ പ്രദേശത്തെ മുഴുവന്‍ ജനങ്ങളെയും സംരക്ഷിക്കുമെന്ന് ഉറപ്പുകൊടുക്കേണ്ട ഉത്തരവാദിത്തം നമുക്കെല്ലാവര്‍ക്കുമില്ലേ?
 |
ഈ റിപ്പോര്‍ട്ട് ജില്ലാ പഞ്ചായത്ത് മെമ്പര്‍മാരുമായും, എം എല്‍ എ മാരുമായും, എം പി മാരുമായും ചര്‍ച്ച ചെയ്തുവെന്ന് മാധവ് ഗാഡ്ഗില്‍ അദ്ദേഹത്തിന്റെ ആമുഖത്തില്‍ എഴുതിയിരിക്കുന്നുണ്ട്. ഈ റിപ്പോര്‍ട്ടിനെ കുറിച്ചുള്ള ജനങ്ങളുടെ ആശങ്കകള്‍ പങ്കുവെക്കുമ്പോള്‍ അത് മുഖവിലക്കെടുക്കാതെ റിപ്പോര്‍ട്ടില്‍ പറയുന്ന കാര്യങ്ങളും വസ്തുതയുമായി താരതമ്യം ചെയ്യാതെ തെറ്റിദ്ധാരണ പരത്തുന്നതാരാണ് എന്നത് വേറെ പരിശോധിക്കണം.
|
കോടിയേരി ബാലകൃഷ്ണന്‍ : വി ഡി സതീശന്‍, നമുക്ക് റിപ്പോര്‍ട്ടുകള്‍ മനസ്സിലാവുമെങ്കിലും അബ്ദുറഹിമാന്‍ രണ്ടത്താണി സൂചിപ്പിച്ച അനുഭവം മുന്നിലുണ്ട്. അദ്ദേഹം പറഞ്ഞതുപോലെ Coastal Regulation zone (CRZ) വന്നപ്പോള്‍ ഒരിക്കല്‍ വെള്ളത്തില്‍ വീണതാണ്. അതിന്റെ ഫലമായി തീരദേശപ്രദേശങ്ങളില്‍ ഒന്നും ചെയ്യാന്‍ സാധിക്കുന്നില്ല. പരിസ്ഥിതി ഘടനയെ തകര്‍ക്കാതെ തീരപ്രദേശങ്ങളില്‍ ടൂറിസം വികസനം സാധ്യമാവും. അതിന് തടസമാവുകയാണ് CRZ. കേരളത്തിന്റെ തീരപ്രദേശങ്ങളിലാണ് ലോകനിലവാരത്തിലുള്ള ടൂറിസം കേന്ദ്രങ്ങള്‍ വളര്‍ത്തിയെടുക്കാനുള്ള സാധ്യതയുള്ളത്. അതിപ്പോള്‍ സാധിക്കുന്നില്ല. ഇതുപോലെEcology Sensitive Zone(ESZ)ല്‍ 14 താലൂക്കുകളാണ് ഉള്‍പ്പെടുന്നത്. അതിലെ 2-ാം നമ്പര്‍ വിഭാഗത്തിലും 3-ാം നമ്പര്‍ വിഭാഗത്തിലും വേറെയും താലൂക്കുകള്‍ വരുന്നുണ്ട്. ജനവാസ കേന്ദ്രങ്ങള്‍ ഇതിനകത്ത് ഉള്‍പ്പെടുത്തണമെന്ന അവസ്ഥ വന്നാലുള്ള സ്ഥിതി ഗുരുതരമായിരിക്കും. അതുകൊണ്ട് ആശങ്ക ദൂരീകരിക്കുവാന്‍ സന്ദര്‍ഭത്തിനനുസരിച്ച് ഇടപെടുകയാണ് വേണ്ടത്.
ഇ എസ് ബിജിമോള്‍ എം എല്‍ എ ഇടപെടുന്നു.
ഇ എസ് ബിജിമോള്‍ : 2011 സെപ്തംബര്‍ 11 ന് സമര്‍പ്പിച്ചിട്ടുള്ള റിപ്പോര്‍ട്ട് ഒമ്പത് മാസക്കാലം വെളിച്ചം കണ്ടിട്ടില്ല. ഒമ്പത് മാസം റിപ്പോര്‍ട്ട് പുറത്തുവിടുകയോ, സമര്‍പ്പിച്ചിട്ടുണ്ടോയെന്നതിന്റെ വിശദാംശവും നമ്മുടെ മുമ്പിലില്ലായിരുന്നു. മാധവ് ഗാഡ്ഗില്‍ ഇത്തരമൊരു റിപ്പോര്‍ട്ട് സമര്‍പ്പിച്ചപ്പോള്‍ അത് പൊതുജന ശ്രദ്ധയിലേക്ക് കൊണ്ടുവരികയും അതുമായി ബന്ധപ്പെട്ട ആളുകള്‍ക്ക് പരാതിയോ മറ്റോ ഉണ്ടെങ്കില്‍ ചര്‍ച്ച ചെയ്യുന്നതിനുള്ള അവസരമൊരുക്കി കൊടുക്കണമായിരുന്നു. ഇവിടെ ചര്‍ച്ച ചെയ്യുന്നതിനുള്ള അവസരമുണ്ടായില്ല. ആളുകളുടെ ഇടയില്‍ ഒരു ആശങ്കയായി മാറുന്ന സ്ഥിതിയിലേക്ക് കാര്യമെത്തിയിരിക്കുന്നു. മാധവ് ഗാഡ്ഗിലിന്റെ 522 ഓളം പേജ് വരുന്ന റിപ്പോര്‍ട്ട് ഡൌണ്‍ലോഡ് ചെയ്ത് ബുക്കാക്കിയപ്പോള്‍ അത് ചുമക്കാന്‍ ഒരാളെ വേണ്ട സ്ഥിതിയാണ്. വായിച്ചുതീര്‍ക്കാന്‍ ഒരു വര്‍ഷമെടുക്കും. ഈ റിപ്പോര്‍ട്ട് ജില്ലാ പഞ്ചായത്ത് മെമ്പര്‍മാരുമായും, എം എല്‍ എ മാരുമായും, എം പി മാരുമായും ചര്‍ച്ച ചെയ്തുവെന്ന് മാധവ് ഗാഡ്ഗില്‍ അദ്ദേഹത്തിന്റെ ആമുഖത്തില്‍ എഴുതിയിരിക്കുന്നുണ്ട്. ഈ റിപ്പോര്‍ട്ടിനെ കുറിച്ചുള്ള ജനങ്ങളുടെ ആശങ്കകള്‍ പങ്കുവെക്കുമ്പോള്‍ അത് മുഖവിലക്കെടുക്കാതെ റിപ്പോര്‍ട്ടില്‍ പറയുന്ന കാര്യങ്ങളും വസ്തുതയുമായി താരതമ്യം ചെയ്യാതെ തെറ്റിദ്ധാരണ പരത്തുന്നതാരാണ് എന്നത് വേറെ പരിശോധിക്കണം.
 |
മാധവ് ഗാഡ്ഗില്‍ റിപ്പോര്‍ട്ടില്‍ പരിസ്ഥിതിക്ക് അനുകൂലമായ കുറേ ഭാഗങ്ങളുണ്ട്. അതിലെ വികസന വിരുദ്ധമായുള്ള കാര്യങ്ങള്‍ തള്ളിക്കളയുക. അങ്ങനെ രണ്ടുരീതിയില്‍ ഈ റിപ്പോര്‍ട്ടിനെ സമീപിക്കണം. റിപ്പോര്‍ട്ടിനുമേല്‍ അനൂകൂലമായും പ്രതികൂലമായും വന്നിട്ടുള്ള എല്ലാ അഭിപ്രായങ്ങളെയും കണക്കിലെടുത്തുകൊണ്ട് സര്‍ക്കാര്‍ ഒരു നോട്ട് തയ്യാറാക്കണം. അതില്‍ അംഗീകരിക്കുന്ന ഭാഗവും അംഗീകരിക്കാന്‍ സാധിക്കാത്ത ഭാഗവും രേഖപ്പെടുത്തണം.
ഒരു സര്‍വ്വകക്ഷിയോഗം ഇത് ചര്‍ച്ച ചെയ്യാന്‍ വേണ്ടി വിളിച്ചുകൂട്ടാന്‍ തയ്യാറാവണം. ഗവണ്‍മന്റിന്റെ നിലപാട് വ്യക്തമാക്കണം. യോജിക്കുന്ന കാര്യങ്ങളും വിയോജിക്കുന്ന കാര്യങ്ങളും തുറന്ന് പറയണം. അതല്ല, ഈ റിപ്പോര്‍ട്ട് പൂര്‍ണമായും തള്ളിക്കളയണമെന്നാണ് ഗവണ്‍മെന്റിന്റെ അഭിപ്രായമെങ്കില്‍ അത് സര്‍വ്വകക്ഷി യോഗത്തിന് മുന്നില്‍ വെക്കണം. പ്രസ്തുത യോഗത്തിന്റെ തീരുമാനമനുസരിച്ച് ഈ റിപ്പോര്‍ട്ടിനെ സംബന്ധിച്ചുള്ള സംസ്ഥാനത്തിന്റെ അഭിപ്രായം രൂപം കൊടുത്ത് അത് കേന്ദ്രസര്‍ക്കാരിനെ അറിയിക്കുന്നതിനുവേണ്ടി മുഖ്യമന്ത്രി തയ്യാറാകണം
|
കോടിയേരി ബാലകൃഷ്ണന്‍ : ഞാന്‍ ഈ റിപ്പോര്‍ട്ട് പൊതുജനസമക്ഷം വയ്ക്കാന്‍ നിര്‍ബന്ധിതനായത് കേരളത്തില്‍ നിന്നൊരു പരിസ്ഥിതി പ്രവര്‍ത്തകന്‍ കേന്ദ്ര ഇന്‍ഫര്‍മേഷന്‍ കമ്മീഷനെ സമീപിച്ചതിനെത്തുടര്‍ന്നാണ്. ഇന്‍ഫര്‍മേഷന്‍ കമ്മീഷന്റെ തീരുമാനത്തിനെ ചോദ്യം ചെയ്തുകൊണ്ട് ഡല്‍ഹിയില്‍ ഹൈക്കോടതിയില്‍ പോയി. ഡല്‍ഹി ഹൈക്കോടതിയുടെ അംഗീകാരം കിട്ടിയതിനുശേഷമാണ് ഇത് പ്രസിദ്ധീകരിക്കുന്നത്. യഥാര്‍ത്ഥത്തില്‍ ഇങ്ങനെയൊരു കോപ്പിയുമായി റിപ്പോര്‍ട്ട് വയ്ക്കേണ്ട കാര്യമില്ല. ഈ സംശയത്തിനൊക്കെ അടിസ്ഥാനമുണ്ടായത് ഇവിടെ നിന്നാണ്. ഈ റിപ്പോര്‍ട്ടിനകത്ത് എന്തൊക്കെ വിശദാംശങ്ങളാണ് ഉള്ളത് എന്നത് പരസ്യപ്പെടുത്തുവാന്‍ തയ്യാറാവാതെ ദുരൂഹമായ നിലയില്‍ കൈകാര്യം ചെയ്തതാണ് ഇത്രയധികം പ്രതിഷേധത്തിന് കാരണമാക്കിയത്.
മാധവ് ഗാഡ്ഗില്‍ റിപ്പോര്‍ട്ടില്‍ പരിസ്ഥിതിക്ക് അനുകൂലമായ കുറേ ഭാഗങ്ങളുണ്ട്. അതിലെ വികസന വിരുദ്ധമായുള്ള കാര്യങ്ങള്‍ തള്ളിക്കളയുക. അങ്ങനെ രണ്ടുരീതിയില്‍ ഈ റിപ്പോര്‍ട്ടിനെ സമീപിക്കണം. റിപ്പോര്‍ട്ടിനുമേല്‍ അനൂകൂലമായും പ്രതികൂലമായും വന്നിട്ടുള്ള എല്ലാ അഭിപ്രായങ്ങളെയും കണക്കിലെടുത്തുകൊണ്ട് സര്‍ക്കാര്‍ ഒരു നോട്ട് തയ്യാറാക്കണം. അതില്‍ അംഗീകരിക്കുന്ന ഭാഗവും അംഗീകരിക്കാന്‍ സാധിക്കാത്ത ഭാഗവും രേഖപ്പെടുത്തണം.
ഒരു സര്‍വ്വകക്ഷിയോഗം ഇത് ചര്‍ച്ച ചെയ്യാന്‍ വേണ്ടി വിളിച്ചുകൂട്ടാന്‍ തയ്യാറാവണം. ഗവണ്‍മന്റിന്റെ നിലപാട് വ്യക്തമാക്കണം. യോജിക്കുന്ന കാര്യങ്ങളും വിയോജിക്കുന്ന കാര്യങ്ങളും തുറന്ന് പറയണം. അതല്ല, ഈ റിപ്പോര്‍ട്ട് പൂര്‍ണമായും തള്ളിക്കളയണമെന്നാണ് ഗവണ്‍മെന്റിന്റെ അഭിപ്രായമെങ്കില്‍ അത് സര്‍വ്വകക്ഷി യോഗത്തിന് മുന്നില്‍ വെക്കണം. പ്രസ്തുത യോഗത്തിന്റെ തീരുമാനമനുസരിച്ച് ഈ റിപ്പോര്‍ട്ടിനെ സംബന്ധിച്ചുള്ള സംസ്ഥാനത്തിന്റെ അഭിപ്രായം രൂപം കൊടുത്ത് അത് കേന്ദ്രസര്‍ക്കാരിനെ അറിയിക്കുന്നതിനുവേണ്ടി മുഖ്യമന്ത്രി തയ്യാറാകണമെന്ന് അഭ്യര്‍ത്ഥിച്ചുകൊണ്ട് ഞാന്‍ എന്റെ വാക്കുകള്‍ ഉപസംഹരിക്കുന്നു.
സിപിഐ എം പോളിറ്റ് ബ്യൂറോ മെമ്പറും പ്രതിപക്ഷ ഉപനേതാവുമായ കോടിയേരി ബാലകൃഷ്ണന്റെ പ്രമേയാവതരണത്തെ തുടര്‍ന്ന് എം എല്‍ എമാരായ ജോസഫ് വാഴക്കന്‍, മുല്ലക്കര രത്നാകരന്‍, ടി എ അഹമ്മദ് കബീര്‍, ജോസ് തെറ്റയില്‍, റോഷി അഗസ്റിന്‍, എ കെ ബാലന്‍, എ എ അസീസ്, ടി എന്‍ പ്രതാപന്‍, രാജു എബ്രഹാം എന്നിവര്‍ ചര്‍ച്ചയില്‍ പങ്കെടുത്ത് സംസാരിച്ചു.
തുടര്‍ന്ന് ചര്‍ച്ചയുടെ പൊതുവായ സ്വഭാവം ഉള്‍ക്കൊണ്ടുകൊണ്ട് മുഖ്യമന്ത്രി പ്രമേയം അവതരിപ്പിച്ചു. : “മാധവ് ഗാഡ്ഗില്‍ കമ്മിറ്റി റിപ്പോര്‍ട്ട് ജനങ്ങളില്‍ ഉണ്ടാക്കിയിരിക്കുന്ന ആശങ്ക ഈ സഭ ഉള്‍ക്കൊള്ളുന്നു. പരിസ്ഥിതി-വനം സംരക്ഷണത്തിന്റെ പ്രസക്തി പൂര്‍ണ്ണമായും അംഗീകരിക്കുന്നതോടൊപ്പം ജനജീവിതവും നാടിന്റെ വികസന ആവശ്യങ്ങളും കൂടി സമന്വയിപ്പിച്ച് കൊണ്ട് പ്രായോഗികമായ ഒരു സമീപനം രൂപീകരിക്കണമെന്ന് സഭ അഭിപ്രായപ്പെടുന്നു. പ്രകൃതി സംരക്ഷണവും നാടിന്റെ വികസന ആവശ്യങ്ങളും പരസ്പര പൂരകമായി പോകുന്നതാണ് ഏറ്റവും അഭികാമ്യമായ സാഹചര്യം. മാധവ് ഗാഡ്ഗില്‍ കമ്മിറ്റി റിപ്പോര്‍ട്ടിലെ അപ്രായോഗികമായ ശുപാര്‍ശകള്‍ അംഗീകരിക്കരുതെന്നും പരിസ്ഥിതി വനമേഖലകളിലെ സംരക്ഷണത്തിനുള്ള നിര്‍ദ്ദേശങ്ങള്‍ ജനപങ്കാളിത്തത്തോടുകൂടി സമഗ്രമായ ചര്‍ച്ചകള്‍ക്കു ശേഷമേ നടപ്പിലാക്കാവൂ എന്നും ഈ സഭ കേന്ദ്രഗവണ്‍മെന്റിനോട് ഐകകണ്ഠ്യേന അഭ്യര്‍ത്ഥിക്കുന്നു''
മുഖ്യമന്ത്രി അവതരിപ്പിച്ച പ്രമേയത്തെ ഭക്ഷ്യവും സിവില്‍സപ്ളൈസും ഉപഭോക്തൃസംരക്ഷണവും രജിസ്ട്രേഷനും വകുപ്പ് മന്ത്രി അനൂപ് ജേക്കബ്ബ് പിന്താങ്ങി.
കോടിയേരി ബാലകൃഷ്ണന്‍ അവതരിപ്പിച്ച ഉപക്ഷേപം സഭയുടെ അനമതിയോടെ പിന്‍വലിച്ചു. മുഖ്യമന്ത്രി അവതരിപ്പിച്ച ചട്ടം 275 പ്രകാരമുള്ള സബ്സ്റാന്‍ഡീവ് പ്രമേയം സഭ ഐക്യകണ്ഠേന പാസാക്കി.
